වනිදු ලෝකෙන්ම එක වෙයි!

  වනිඳු ලෝකෙන්ම එක වෙයි !

වනිඳු! අද ලෝකයක් කතාබහ කරන මාතෘකාවක් බවට පත් වෙලා. ඒ ලෝකයෙන්ම අංක 1 දක්ෂතම මෙන්ම සුපිරිතම T-20 පන්දු යවන්නා බවට පත් වෙමින්.

ගාල්ල දොඩන්දූව ප්‍රදේශයේ ඉපදෙන පින්නදූවගේ වනිඳු හසරංග ද සිල්වා වයස අවුරුදු 24ක නවක මෙන්ම යොවුන් ක්‍රිකට් ක්‍රීඩකයෙක් වශයෙන් හඳුන්වන්න පුලුවන්. ගාල්ල රිච්මන්ඩ් විද්‍යාලයෙන් සිප්සතර හැදෑරූ වනිඳුගේ දක්ෂතාවයන් මුල් වරට හඳුනා ගන්නේද පාසලයි. ඒ පාසල් මට්ටමෙන් පැවති ක්‍රිකට් තරඟ වලදී ඔහු දැක්වූ විශිෂ්ඨ දස්කම් නිසාවෙන්.

මේ නිසාම ඉතාම කෙටි කාලයක් තුල ජාතික ක්‍රිකට් කණ්ඩායමට පිවිසෙන වනිඳු දිනෙන් දින තම දක්ෂතා එලි දක්වමින් ටෙස්ට්, එක්දින, T-20 ක්‍රිකට් තරඟ වලදී පන්දු යැවීමෙන්, පන්දු රැකීමෙන් මෙන්ම පිතිහරඹයෙන්ද ක්‍රිකට් පිටිය වර්ණවත් කරමින් ලංකාවට ජයග්‍රහණ රැසක් හිමි කර දීමේ නියමුවා වන්නට හැකි වුණා. ඒ නිසාම ලෝ අති විශිෂ්ඨයන්ගේ එකතුවෙන් දිගහැරෙන IPL තරඟාවලියේ රෝයල් චැලෙන්ජර්ස් බැංගලෝර් කණ්ඩායමේ සාමාජිකත්වයද ඔහු වෙනුවෙන් වෙන් වුණා.

මේ සුපිරි දක්ෂතාවයන්හි උච්ඡතම අවස්ථාවේ උපරිම ඵල නෙලා ගනිමින් මෙවර පන්දුවාර 20-20 ලෝක කුසලාන ක්‍රිකට් තරඟාවලිය තුලදී නවතම ICC T-20 පන්දු යැවීමේ ශ්‍රේණිගත කිරීම් අනුව ප්‍රසාද ලකුණු 776 ක් ලබා ගනිමින් ලොව ප්‍රථම ස්ථානය ලබා ගැනීිමට වනිඳු හසරංග පසුගියදා (3 වැනිදා) සමත් වුණා . ඒ මෙතෙක් එම වාර්තාවට හිමිකම් කියූ ප්‍රසාද ලකුණු 770ක් ලබා සිටි දකුණු අප්‍රිකානු ක්‍රීඩක තබ්‍රේස් ශම්සි  අභිභවමින්. එපමණක්ද නොව ICC T-20 තුන් ඉරියව් ශ්‍රේණිගත කිරීම් වලින්ද 4 වැනි ස්ථානය දක්වා ඉදිරියට පැමිණීමට වනිඳු සමත් වී තිබෙනවා. කලකට පසුව ශ්‍රී ලංකා පන්දු යවන්නෙකු මෙලෙස ICC ශ්‍රේණිගත කිරීම් වල පලමු ස්ථාන අතරට පැමිණි පලමු අවස්ථාවද මෙයයි.

මෙලෙස දඟ පන්දු යවන්නෙකු වශයෙන් ක්‍රිකට් දිවියට පා තබා නොබෝ කලක් යාමට මත්තෙන් ලොවක් සසල කල අති දක්ෂ පන්දු යවන්නෙකු ලෙස වනිඳු මේ වන විට නම් දරා අවසන්. ඉතින්,මේ ආරම්භය පමණයි. යාමට තවත් බොහෝ දුර තිබේ. වනිඳු, ඔබට උණුසුම් සුභපැතුම්!

                                                                  

                                                              - ✍️සදා -