රිෂාඩ් බදියුර්දීන් ඇප මත නිදහස් කෙරේ
මාස 6කට ආසන්න කාලයක් කොළඹ අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන රැඳවුම් නියෝග මත ප්‍රශ්න කරමින් සිටි පාර්ලිමේන්තු මන්ත්‍රී රිෂාඩ් බදියුර්දීන් මහතා අද දින ඇප මත නිදහස් කිරීමට අධිකරණය නියෝග කලා.
ඔහු මෙලෙස රක්ෂිත බන්ධනාගාර ගත කර තිබුනේ නඩු වාර්තා 2ක් යටතේ සැකකරු වශයෙනි.
ඉන් එකක් වූයේ 2019 වර්ෂයේ අප්‍රේල් මස 21 වන දින සිදු වූ "පාස්කු ප්‍රහාරයට" සම්බන්ධව රිෂාඩ් බදියුර්දීන් මන්ත්‍රීවරයාට චෝදනා එල්ල වීමයි.ඒ අනුව ත්‍රස්තවාදය වැලැක්වීමේ පනත යටතේ පසුගිය අප්‍රේල් මස 24 වනදා ඔහුව අත්අඩංගුවට ගෙන මේ වන තෙක් ඔහුව රක්ෂිත බන්ධනාගාර ගත කර තිබුණි.
ඊට අදාල නඩුව අද මහේස්ත්‍රාත් ප්‍රියන්ත ලියනගේ මහතා හමුවේ කැඳවූ අතර එහිදී මන්ත්‍රීවරයා ඇප මත මුදා හැරීමට නියෝග කෙරිණි.
ඒ අනුව රුපියල් ලක්ෂ 50 බැගින් වූ ශරීර ඇප 2ක් මත ඔහු මුදා හැරුණු අතර සති 2කට වරක් ඔහු අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසටද නියෝග විය.
රිෂාඩ් බදියුර්දීන් මන්ත්‍රීවරයා රක්ෂිත බන්ධනාගාර ගත වී සිටියදීම ඔහුගේ නිවසේ සේවය කල මෙහෙකාර දැරිය වූ "හිෂාලිනී ජූඩ් නැමති 16 හැවිරිදි දැරිය පිළිස්සී මිය යාමේ සිද්ධියට "වරදකරු වශයෙන්ද ඔහුට චෝදනා එල්ල විය.මේ සිද්ධියට අදාල නඩුව අද දින කොළඹ අතිරේක මහේස්ත්‍රාත් රජින්ද්‍රා ජයසූරිය මහත්මිය ඉදිරියේ කැඳවනු ලැබිණ.
එහිදී පැමිණිල්ල වෙනුවෙන් පෙනී සිටි රජයේ නීතීඥවරයා අධිකරණයට දන්වා සිටියේ මෙම සිද්ධියට අදාලව විමර්ශන කටයුතු බොහෝ දුරට අවසන් වී ඇති හෙයින් සැකකරැ ඇප මත මුදා හැරීම සම්බන්ධයෙන් විරුද්ධත්වයක් නොමැති බවයි.
ඒ අනුව රිෂාඩ් බදියුර්දීන් මන්ත්‍රීවරයා රුපියල් ලක්ෂ 10 බැගින් වූ ශරීර ඇප 2ක් මත මුදාහැරීමට මහේස්ත්‍රාත්වරිය නියෝග කල අතර සැකකරුට විදෙස් ගමන් සියල්ල තහනම් කිරීමද සිදු කෙරිණි.
වැඩිදුර නඩු විභාගය ලබන වසරේ පෙබරවාරි මස 18 වනදා නැවත වරක් කැඳවීමට මහේස්ත්‍රාත්වරිය නියෝග කරන ලදි.
-✍️සදා-
